پۇتنىڭ پېيى تارتىشىپ قېلىش بىر خىل دائىم كۆرۈلىدىغان ھادىسە، نۇرغۇن كىشىلەرنىڭ تۇيۇقسىز پۇت مۇسكۇللىرى قىسقىراپ، تارتىشىپ، ئاغرىققا چىدىيالماي قالىدۇ، بۇ ئەھۋال دائىم كېچىدە ئۇخلىغاندا ياكى ھەرىكەت جەريانىدا قوزغىلىدۇ ۋە كىشىلەرنىڭ تۇرمۇشىغا نۇرغۇن قولايسىزلىق ۋە قىيىنچىلىق ئېلىپ كېلىدۇ. ئۇنداقتا پۇتنىڭ پېيى تارتىشىپ قېلىش زادى قانداق ئىش؟ بۇنىڭ كەينىگە ئەمەلىيەتتە كۆپ خىل سەۋەب يوشۇرۇنغان.
ئالدى بىلەن، سوغۇقنىڭ غىدىقلىشى پۇتنىڭ پېيى تارتىشىپ قېلىشنىڭ دائىم كۆرۈلىدىغان سەۋەبلىرىنىڭ بىرى. پۇت قىسمى سوغۇق مۇھىتتا تۇرغاندا، پۇت مۇسكۇللىرى سوغۇقتىن قىسقىراپ، ئىسسىقلىقنىڭ تارقىلىپ كېتىشىنى ئازايتىدۇ. ئەگەر بۇ خىل قىسقىرىش زىيادە بولۇپ كەتسە ياكى داۋاملىشىش ۋاقتى بەك ئۇزۇن بولۇپ كەتسە، ئاسانلا مۇسكۇللار تارتىشىپ قالىدۇ، يەنى پەي تارتىشىپ قالىدۇ. مەسىلەن، قىشتا ئۇخلىغاندا، ئەگەر پۇتقا يوتقان يېپىنمىسا ياكى ئۇزۇن ۋاقىت سوغۇق سىرتتا مېڭىپ، ھەرىكەت قىلىپ، پۇتنى ئىسسىق ساقلاش تەدبىرلىرىنى ياخشى ئىشلىمىسە، پۇتنىڭ پېيى تارتىشىپ قېلىشى مۇمكىن. زىيادە ھەرىكەت قىلىشمۇ بىر مۇھىم ئامىل. ئۇزۇن ۋاقىت ياكى يۇقىرى سىجىللىقتىكى ھەرىكەت پۇت مۇسكۇللىرىنى چارچىتىپ، يەرلىك ئورۇندا سۈت كىسلاتاسىنىڭ يىغىلىپ قېلىشىنى كەلتۈرۈپ چىقىرىدۇ. سۈت كىسلاتاسى مۇسكۇللارنىڭ نېرۋا ئاخىرقى ئۇچلىرىنى غىدىقلاپ، مۇسكۇللارنىڭ قوزغىلىشچانلىقىنى ئاشۇرۇپ، ئاسانلا پەي تارتىشىپ قېلىشنى كەلتۈرۈپ چىقىرىدۇ. مەسىلەن، ئۇزۇنغا يۈگۈرۈش، تاغقا چىقىش، پۇتبول مۇسابىقىسى قاتارلىق ھەرىكەتلەرنى قىلغاندىن كېيىن، نۇرغۇن كىشىلەردە پۇتىنىڭ پېيى تارتىشىپ قېلىش ئەھۋالى كۆرۈلىدۇ. ئۇنىڭدىن باشقا، ھەرىكەت قىلىشتىن بۇرۇن بەدەننى تولۇق قىزىتمىغاندا، مۇسكۇللار تۇيۇقسىز ئەركىن ھالەتتىن جىددىي ھالەتكە ئۆتىدۇ، بۇمۇ پەي تارتىشىپ قېلىش خەۋپىنى ئاشۇرۇۋېتىدۇ. بەدەندە كالتسىي كەم بولسا ئوخشاشلا سەل قاراشقا بولمايدۇ. كالتسىي مۇسكۇللارنىڭ قىسقىرىشى ۋە كېڭىيىش جەريانىدا ئاچقۇچلۇق رول ئوينايدۇ. قاندىكى كالتسىي ئىئونىنىڭ قويۇقلۇقى بەك تۆۋەن بولغاندا، مۇسكۇللارنىڭ قوزغىلىشچانلىقى ئېشىپ، ئاسانلا تارتىشىپ قالىدۇ. بولۇپمۇ ياشانغانلار، ھامىلىدار ئاياللار ۋە ياش-ئۆسمۈرلەرنىڭ ئۆسۈپ يېتىلىشىنىڭ يۇقىرى پەللە مەزگىلىدىكى كىشىلەرنىڭ كالتسىيغا بولغان ئېھتىياجى بىر قەدەر يۇقىرى بولىدۇ، ئەگەر يېمەك-ئىچمەكتە كالتسىينىڭ قوبۇل قىلىنىشى يېتەرلىك بولمىسا ياكى بەدەننىڭ كالتسىينى سۈمۈرۈشىدە مەسىلە كۆرۈلسە، ئاسانلا كالتسىي كەملىك سەۋەبىدىن پۇتنىڭ پېيى تارتىشىپ قالىدۇ.
يەنە بەزى كېسەللىكلەرمۇ پۇتنىڭ پېيى تارتىشىپ قېلىشنى كەلتۈرۈپ چىقىرىشى مۇمكىن. مەسىلەن، بەل ئومۇرتقا ئارىلىق تەخسىسى پولتىيىپ چىقىش كېسىلىگە گىرىپتار بولغان بىمارلارنىڭ پولتىيىپ چىققان ئومۇرتقا ئارىلىق تەخسىسى نېرۋا يىلتىزىنى بېسىۋېلىپ، نېرۋىنىڭ پۇت مۇسكۇللىرىنى باشقۇرىشىغا تەسىر يەتكۈزۈپ، مۇسكۇل ئىقتىدارىنىڭ نورمالسىزلىقىنى پەيدا قىلىپ، پەي تارتىشىپ قېلىشنى كەلتۈرۈپ چىقىرىشى مۇمكىن. تۆۋەنكى مۈچە ئارتېرىيەسى قېتىپ توسۇلۇش كېسىلىگە گىرىپتار بولغانلارنىڭ پۇتىدىكى قان ئايلىنىش راۋان بولمىغاچقا، مۇسكۇللار يېتەرلىك قان بىلەن تەمىنلەنمەيدۇ، شۇنداقلا ئاسانلا پەي تارتىشىپ قېلىش ئەھۋالى كۆرۈلىدۇ. ئۇنىڭدىن باشقا، پاركىنسون كېسىلى، دىئابېت كېسىلى، نېرۋا كېسەللىك ئۆزگىرىشى قاتارلىق بەزى نېرۋا سىستېمىسى كېسەللىكلىرىدىمۇ پۇتنىڭ پېيى تارتىشىپ قېلىش ئالامەتلىرى كۆرۈلۈشى مۇمكىن.
پۇتنىڭ پېيى تارتىشىپ قېلىشنىڭ سەۋەبىنى بىلگەندىن كېيىن، بىز يەنە قانداق ئۈنۈملۈك پەسەيتىش ئۇسۇللىرىنى كۆرۈپ باقايلى. پۇتنىڭ پېيى تارتىشىپ قالغاندا، ئېلىپ بېرىلىۋاتقان ھەرىكەتنى دەرھال توختىتىپ، پەي تارتىشىپ قالغان پۇتنى ئامال بار تۈز سوزۇپ، پۇت بارماقلىرىنى تىز تەرەپكە كۈچەپ قايرىش كېرەك، بۇنداق قىلغاندا تارتىشىپ قالغان مۇسكۇلنى سوزۇپ، ئاغرىقنى پەسەيتكىلى بولىدۇ. شۇنىڭ بىلەن بىر ۋاقىتتا، پەي تارتىشىپ قالغان مۇسكۇللارنى قول بىلەن يېنىك ئۇۋۇلاپ، قان ئايلىنىشنى ئىلگىرى سۈرۈپ، مۇسكۇللارنى بوشىتىشقا ياردەم بېرىش كېرەك. ئەگەر سوغۇقنىڭ غىدىقلىشىدىن كېلىپ چىققان پەي تارتىشىپ قالغان بولسا، ۋاقتىدا پۇتنى ئىسسىق ساقلاش، مەسىلەن، ئەدىيال يېپىش ياكى قېلىن كىيىم كىيىش كېرەك.
زىيادە ھەرىكەت قىلىشتىن كېلىپ چىققان پەي تارتىشىشقا قارىتا، ھەرىكەتتىن كېيىن تولۇق سوزۇش، بوشىتىش ھەرىكىتى ئېلىپ بېرىپ، مۇسكۇللارنىڭ سۈت كىسلاتاسىنى چىقىرىپ تاشلىشىغا ياردەم بېرىپ، پەي تارتىشىشنىڭ يۈز بېرىشىنى ئازايتىش كېرەك. ئادەتتە ھەرىكەت سىجىللىقى ۋە ۋاقتىنى مۇۋاپىق ئورۇنلاشتۇرۇشقا دىققەت قىلىپ، زىيادە چارچاشتىن ساقلىنىش كېرەك. كالتسىي كەملىكتىن كېلىپ چىقىدىغان پۇتنىڭ پېيى تارتىشىپ قېلىشنىڭ ئالدىنى ئېلىش ئۈچۈن، كۈندىلىك يېمەك-ئىچمەكتە كالتسىي تەركىبى مول بولغان يېمەكلىكلەرنى، مەسىلەن، كالا سۈتى، پۇرچاق ياسالمىلىرى، بېلىق، راك، قاتتىق پوستلۇق مېۋە قاتارلىقلارنى كۆپرەك ئىستېمال قىلىش كېرەك. كالتسىي كەملىك بىر قەدەر ئېغىر بولغان كىشىلەر دوختۇرنىڭ كۆرسەتمىسى بويىچە كالتسىي دورىسى ۋە ۋىتامىنD تولۇقلاپ ،كالتسىينىڭ سۈمۈرۈلۈشىنى ئىلگىرى سۈرسە بولىدۇ. ئەگەر پۇتنىڭ پېيى تارتىشىپ قېلىش كۆپ قوزغالسا ھەمدە باشقا بىئاراملىق ئالامەتلىرى قوشۇلۇپ كەلسە، مەسىلەن، ئاغرىق داۋاملىق پەسەيمىسە، پۇت ئۇيۇشۇپ، ماغدۇرسىزلانسا، ۋاقتىدا دوختۇرغا كۆرۈنۈپ، تەپسىلىي تەكشۈرتۈپ، يوشۇرۇن كېسەللىك ئامىللىرىنى تۈگىتىپ، قاراتمىلىقى بولغان ھالدا داۋالاش كېرەك. قىسقىسى، پۇتنىڭ پېيى تارتىشىپ قېلىش گەرچە كۆپ ئۇچرايدىغان بولسىمۇ، لېكىن ئۇنىڭ پەيدا قىلىدىغان سەۋەبى كۆپ تەرەپلىمىلىك بولىدۇ. بۇ سەۋەبلەرنى چۈشىنىش ھەمدە مۇناسىپ پەسەيتىش ۋە ئالدىنى ئېلىش تەدبىرلىرىنى قوللىنىش ئارقىلىق، پۇتنىڭ پېيى تارتىشىپ قېلىشنى ئۈنۈملۈك ئازايتىپ، تۇرمۇشنى تېخىمۇ ئازادە قىلغىلى بولىدۇ.
| خۇش كەپسىز Discuz! Board (http://tibabat.com/) | Powered by Discuz! X3.3 |