زۇكام بولغاندىن كېيىن يۈرىكىڭىز بىئارام بولدىمۇ؟ يۈرەك مۇسكۇلى ي...

admin

ئادەم بەدىنىنىڭ ئىممۇنىتېت كۈچى چېكىنگەندىن كېيىن، ۋىرۇس پۇرسەتتىن پايدىلىنىپ بۆسۈپ كىرىپ، ئۈستۈنكى نەپەس يولىغا تاجاۋۇز قىلىپ كىرىدۇ، بۇ بىز دائىم دەيدىغان «زۇكام». ئەگەر بۇ ۋاقىتتا داۋاملىق چارچىسا، مەسىلەن، تۈنەپ ئىسمېنا قوشۇپ ئىشلەش، قاتتىق ھەرىكەت قىلىش، داۋاملىق جىددىيلىشىش، ئېغىر جىسمانىي ئەمگەك بىلەن شۇغۇللىنىش قاتارلىق ئەھۋاللار كۆرۈلسە، ۋىرۇسلۇق يۈرەك مۇسكۇلى ياللۇغى خەۋپىنى زور دەرىجىدە ئاشۇرۇۋېتىدۇ. يۈرەك مۇسكۇلى ياللۇغىنىڭ ئالامەتلىرى قايسىلار؟ قانداق ئالدىنى ئالغىلى بولىدۇ؟ بۇنىڭ ئۈچۈن خەلق تورى پايتەخت تېببىي داشۆسى قارمىقىدىكى بېيجىڭ ئەنجېن دوختۇرخانىسى كىلاپان ۋە دالانچە تىترەش تاشقى كېسەللىكلەر مەركىزىنىڭ مۇئاۋىن مۇدىر ۋىراچى بەي چېننى زىيارەت قىلدى.

بەي چېن تونۇشتۇرۇپ مۇنداق دېگەن:«يۈرەك مۇسكۇلى ياللۇغى يۈرەك مۇسكۇل ھۈجەيرىلىرىنىڭ زىيانغا ئۇچرىشى، چەكلىمىلىك ياكى يامراش خاراكتېرلىك كېسەللىك ئۆزگىرىشىنى كەلتۈرۈپ چىقىرىدۇ». بارلىق يۈرەك مۇسكۇلى ياللۇغى ئىچىدە، ۋىرۇسلۇق يۈرەك مۇسكۇلى ياللۇغى كۆپ قىسمىنى ئىگىلەيدۇ، كېسەللىك پەيدا قىلغۇچى ۋىرۇس تارقىلىشچان زۇكام ۋە قوشۇمچە تارقىلىشچان زۇكام ۋىرۇسى، ئىنچىكە تارقىلىشچان زۇكام ۋىرۇسى، ئۈچەي يولى ۋىرۇسى، بەز ۋىرۇسى قاتارلىقلارنى ئۆز ئىچىگە ئالىدۇ، بۇنىڭ ئىچىدە بىر قەدەر كۆپ ئۇچرايدىغىنى ئۈچەي ياللۇغى بەز يولى ۋىرۇسى ۋە بەز ۋىرۇسى. بۇ ۋىرۇسلار يۈرەكتىن ئۆتكەندە، يۈرەك مۇسكۇل ھۈجەيرىلىرىگە بىۋاسىتە تاجاۋۇز قىلىپ، ھۇجۇم قىلىپ زىيان يەتكۈزۈشى مۇمكىن. ئۇنىڭدىن باشقا، باشقا پاتوگېنلىق يۇقۇملىنىشلارمۇ يۈرەك مۇسكۇلى ياللۇغىنى كەلتۈرۈپ چىقىرىدۇ، بۇ مىكوپىلازما بىلەن يۇقۇملىنىش، زەمبۇرۇغدىن يۇقۇملىنىش قاتارلىقلارنى ئۆز ئىچىگە ئالىدۇ، يۇقۇملىنىشقا مۇناسىۋەتلىك يۈرەك مۇسكۇلى ياللۇغى ئومۇملاشتۇرۇلۇپ يۇقۇملىنىش خاراكتېرلىك يۈرەك مۇسكۇلى ياللۇغى دەپ ئاتىلىدۇ.

«يېنىك تىپتىكى يۈرەك مۇسكۇلى ياللۇغىنىڭ ئالامەتلىرى دائىم كۆرۈلىدىغان جىددىي خاراكتېرلىك يۇقىرى نەپەس يولى يۇقۇملىنىش ئالامەتلىرىگە ئوخشايدۇ، مەسىلەن، يېنىك دەرىجىدە چارچاش، كۆكرەك سىقىلىش، كۆكرەك ئاغرىش قاتارلىقلار، ئاسانلا سەل قارىلىدۇ. ئوتتۇرا، ئېغىر تىپتىكى يۈرەك مۇسكۇلى ياللۇغىغا گىرىپتار بولغان بىمارلاردا كۆپىنچە قاتتىق چارچاش، نەپەس ئېلىش قىيىن بولۇش، قورساق ئاغرىش، قۇسۇش، مۇسكۇل بېسىلىپ ئاغرىش قاتارلىق ئالامەتلەر كۆرۈلىدۇ، قىسمەن بىمارلاردا يەنە تۆۋەنكى مۈچە سۇلۇق ئىششىقى پەيدا بولىدۇ، تۈز ئولتۇرۇپ نەپەسلىنىشكە ئامالسىز قالىدۇ. بۇ بەلكىم يۈرەك زەئىپلىشىشنىڭ ئالامەتلىرى بولۇشى، خەتىرى ئىنتايىن يۇقىرى، يۈكسەك دىققەت قىلىشقا توغرا كېلىدۇ.

بەي چېن مۇنۇلارنى بىلدۈردى: گەرچە ۋىرۇسنىڭ يۈرەككە تاجاۋۇز قىلىش ئەھۋالى دائىم بولمىسىمۇ، لېكىن زۇكام بولغاندىن كېيىن يۈرەك بىئارام بولۇش قاتارلىق ئەھۋاللار كۆرۈلسە، ھەرگىز ئۆز بېشىمچىلىق بىلەن دورا ئىچىپ داۋالانماسلىق، دەرھال دوختۇرخانىغا بېرىپ سەۋەبىنى تەكشۈرۈش كېرەك.

يۈرەك مۇسكۇلى ياللۇغىنى داۋالاشتا، بەي چېن دەم ئېلىشنىڭ يۈرەك مۇسكۇلى ياللۇغى بىمارلىرىنىڭ ئەسلىگە كېلىشىنىڭ مۇھىم شەرتى ئىكەنلىكىنى تەكىتلىدى. جىددىي يۇقۇملىنىش مەزگىلىدە، بىمار ئىمكانقەدەر كۆپرەك ئارام ئېلىپ، ئىممۇنىتېت سىستېمىسىنىڭ كېسەللىك قوزغاتقۇچىلارغا قارشى تۇرۇشىنى قوزغىتىپ، ئەسلىگە كەلتۈرۈشنى تاماملىشى كېرەك. بۇ مەزگىلدە، ھېچقانداق ھەرىكەت قىلىش تەۋسىيە قىلىنمايدۇ. يۇقۇملىنىشنىڭ كېيىنكى مەزگىلىدە، كېسەللىك ئالامەتلىرى يېنىكلىگەندە، ئارام ئېلىشقا دىققەت قىلىش، ئەڭ ياخشىسى 1 ئايدىن 3 ئايغىچە ئارام ئېلىش كېرەك. كېسەللىك ئالامىتى پۈتۈنلەي يوقالغاندىن كېيىن، بىمار تەدرىجىي ھالدا خىزمەت ۋە نورمال تۇرمۇشىنى ئەسلىگە كەلتۈرسە بولىدۇ، لېكىن يەنىلا چارچاپ كەتمەسلىككە دىققەت قىلىش، بىر يىل ئىچىدە جىسمانىي ئەمگەك ۋە قاتتىق ھەرىكەت قىلماسلىق كېرەك.

يۈرەك مۇسكۇلى ياللۇغىنىڭ قانداق ئالدىنى ئېلىش كېرەك؟

يۇقۇملىنىش خەۋپىنى تۆۋەنلىتىش مۇھىم ھالقا. نەپەس يولى يۇقۇملۇق كېسەللىكلىرى كۆپ يۈز بېرىدىغان پەسىلدە، مۇداپىئە تەدبىرلىرىنى ياخشى ئىشلەش كېرەك، مەسىلەن، ماسكا تاقاش، قولنى پات-پات يۇيۇش قاتارلىقلار، ھەر خىل يۇقۇملىنىش مەنبەلىرى بىلەن ئۇچرىشىشتىن ساقلىنىش كېرەك. شۇنىڭ بىلەن بىر ۋاقىتتا، ئىسسىق ساقلاش، سوغۇقتىن ساقلىنىشقا دىققەت قىلىپ، بەدەننىڭ ئىممۇنىتېت كۈچىنى ئاشۇرۇش كېرەك. ئەگەر ئېھتىياتسىزلىقتىن ۋىرۇس ياكى باشقا كېسەللىك قوزغاتقۇچىلار بىلەن يۇقۇملىنىپ قالسا، سالامەتلىكنى ئەسلىگە كەلتۈرۈش مەزگىلىدە چوقۇم ئوزۇقلۇق ۋە ئارام ئېلىشقا كاپالەتلىك قىلىپ، ياخشى تۇرمۇش ئۇسۇلى ۋە كەيپىياتنى ساقلاش كېرەك. ئۇنىڭدىن باشقا، يۈرەك مۇسكۇلى ياللۇغىنىڭ دائىم كۆرۈلىدىغان ئالامەتلىرىنى چۈشىنىش، ۋاقتىدا بايقاش، ۋاقتىدا داۋالاش ئېغىر كېسەل خەۋپىدىن ساقلىنىشنىڭ مۇھىم تەدبىرى.